Monday, June 10, 2013

النزول الى الشارع 3 : شعب ضد شعب


من اﻵخر ما في زعيم ضد زعيم؛ في شعب ضد شعب ....في شعب ضد شعب، كرمال يَحْصّل مكتسبات لشي زعيم!
ما في برنامج حواري سياسي ليقول شو صاير بالبلد...في برنامج حواري سياسي ليّجيّش شعب على شعب هني قاعدين بكرافتاتن ونحنا على اﻷرض وآخدين دور: رامبو، أحمد السقا، جاكي شان..الخ...يلي بدكن ياه! 

 
خطوط التماس: نسينا أو ما نسينا؟

نحنا شطرنج طاير الملك في من أول الدق، نحنا مش نحنا وقت نكون طائفيين "وياعيني على السنكيرز يا عيني على دلال".
يا خي انا ما عبالي كون مشروع شهيد حرب أهلية!!! حريج مخي شي؟ 

لحظة عبالك نحكي بشكل طائفي ؟ ماشي ما في مشكل..سماع يا ابو الحبايب

انا جاد شحرور من الجنوب...ﻷ مش شيعي وبيت شحرور في منن سنة بالعرقوب...وﻷ مش كل السنة قاعدين بنص بيروت...أنا قاعد بحارة حريك...منبوذ من سنية بيروت ﻷن قاعد بالضاحية ومنبوذ من الشيعة ﻷن سني قاعد بالضاحية...من اﻵخر ما الي محل عيش في!!! بس مسائبة ما حابب هج وسافر على البورابورا...بدي ضلني بحارة حريك واشرب قهوة بالحمرا واكل مناقيش من عند فرن شوشو على طلعة المقاصد..عفكرة صحيح انا سني بس سائبت اني دارس ب" الاسلام رسالتنا" ايه كتاب ديني شيعي !!! وعفكرة بعيلتي مسميين علي وحسن وزينب وفاطمة وحسين وجواد وكلنا سنة من العرقوب ومن بيت شحرور! نص عيلتي آخدين شيعة...يعني إذا بلشت الحرب! القتل عنا بصير أهلية بمحلية ما حدا غريب...

الدبح على الهوية

بعكس كل الدول...الديمقراطية عنا خربتلنا بيتنا! إنو شو منستفيد من حرية التعبير يلي بتقول " حزب الله حزب إرهابي " و " تيار المستقبل إسرائيلي "..إنو شو هالحرية يلي عم نتمجد فيها...للأسف نحنا ما خرجنا لا حرية ولا ديمقراطية!! ما خرجنا حكم عسكري حتى!!! 

كيف قادرين كشعب نتحمل منظمات سياسية كانت طرف أساسي بالحرب الأهلية؟ هيدا يلي رايحلو شهيد بعيلتو إن خي أو بي أو إم كيف بينتخب ناس كانوا يدبحوهن قبل؟

عميل..لأ...إنت عميل

سؤال برسم البيع : نحنا بشر أو بقر ؟ 

هوي الله قلنا إنتو حيوانات بس بعقل! ضروري نرفس النعمة ونصير بلا عقل متلنا متل الدواب؟ 

حب طائفي