Friday, June 7, 2013

النزول الى الشارع 2 : بئر العبد vs. ساحة الشهداء


دار الحوار التالي بيني وبين الحلاق المجاور لبيتي:
الحلاق: "معقول ما قدرو للقصير غير لادخل حزب الله!؟....قليلة شو رحلنا قتلة! ﻹمتى بدنا نضل انموت؟"
ثم سحب فوطة ووضعها حول عنقي واحكم ربطها
انا: " دايماً العترة علينا " 
الحلاق: " ﻷ غلطان! العترة على المتوالي...نحنا يلي عم نموت"
تناول الموس وغير شفرته
أنا: " اللبناني بشكل عام "
نظر الي ثم سألني 
الحلاق: " انت من وين؟"
أنا: " من عنا من الضيعة...إنت من وين؟" 
ابتسم الحلاق وقال
الحلاق: " لا عنجد من وين؟ " 
أنا : " من الجنوب "

الحلاق : " من وين من الجنوب؟ "
أنا: " كفرحمام "
الحلاق :" هيدي حد كفر جوز؟"
انا : " ﻷ مش هونيك!"
الحلاق: " طب وين؟...قضاء شو؟ "
انا : " بدك تعرف الطايفة؟ "
وبدء الحلاق يضع معجون الحلاقة على وجهي حتى مرمغ فمي وقال
الحلاق: " له ليه عم تقول هيك..من الجنوب يعني متلي متوالي"
انا : " ﻷ انا سني؛ نحنا حد شبعا وكفرشوبا وراشيا الفخار" 
ثم شرد للحظة 
الحلاق: " ايه بعرف المنطقة عندي رفيقتي من الهبارية! "
أنا: " الوجع ما بيوجع الا صحابو...قليلة شو صار فينا بحرب تموز" 
الحلاق: " ليه شو صار عليكن  انتو.....بحارة حريك"
**** هلىء صار في كلمة جديدة بالحوار " انتو" بس رجع زبطا وقال بحارة حريك" 
انا: " شو شو صار؟؟؟ لا ضل قزاز ولا عفش وحيط البرندا متل ماكل قذيفة حرزانة..بتقلي شو صار؟ ولا ضروري توقع البناية ؟؟"
الحلاق: " بس عوضولكن"
أنا: " الا نحنا...ما عوضوا  علينا بشي..واﻷنكى اجو كشفوا..تمنوا القصة ب 150 $ عفش وحيط وتوريق وطرش وقزاز كلو رايح وطلع معن 150$" 
الحلاق : " نعيما"
انا :" الله ينعم عليك " 
دفعنا 3000 ل.ل كاش حاسبنا الزلمي ورجعت على البيت...
------------------------
ما حدث هو نموذج عن شي يومي ممكن يصير بأي منطقة! القصة وين؟ القصة هي انا نعرف مين عم يجاهد مين ﻷ...مين قدم شهدا مين ﻷ...
لحظة هيدي الجملة الغلط "مين قدم شهدا؟"...دايما منسمعا بالشارع..عأساس كاين الشهيد شي لوحة او بوكية زهور للتقدم لطائفة او لزعيم!
فينا نثور ببئر العبد ...فينا نثور بساحة الشهدا..بس مسائبة الموقع سياسي مش وطني...ساعة 8 ساعة 14..ﻷ! الساعة وحدة الا خمسة !
هون بلشنا نرجع لورا...انفجار الوحدة الا خمسة بعيد الحب! ايه والله..اخت يلي عم بزل عليكن من هالساعة وبرايح بلشنا نتفرفط بهالبلد علنياً...نحنا كنا مفرفطين قبل بس بالسر وكان يضل في ابتسامات بس هلىء ماكسيموم في صرامي بخلق بعضنا وكبايات مي طايرة.
نزلنا عساحة الشهداء ببرنيطة حزب الله كرمال رغيف الخبز ونزل معنا الشيوعي كمان ﻷن سوا بالمقاومة مش أكتر...هلىء قبل كمان نزلنا عساحة الشهدا ووقتا جبنا الحريري junior للرئاسة....الله يعين هالشهداء شو مارق عليهن مظاهرات....
بس نحنا ما مننزل عالشارع هيك! انتبه نحنا مننزل عالشارع لنفرفط المؤامرة..بس حظنا مش مساعدنا ما عم يطلع بإيدنا! بالكتير عم نفرفط بلح..بتتظاهر ببئر العبد ببتظاهر بساحة الشهداء بتتظاهر بقرودة السودا...كلو طق حنك...إتفضب بزوق بوج زعيمك بعدين ما طرح ما بدك منتظاهر...يا خي مستعد نتظاهر مع massage extra منيح هيك؟

جاد شحرور