Sunday, October 7, 2012

وفاة زياد الرحباني

وفاة زياد الرحباني
                      
جمهورياً
بعيد الشر عن قلبو وبكل الاعياد من الأضحى للكريسماس...



طل زياد المنتظر عبر قناة الميادين، مدمرا آمال بعض الجماهير التي إعتقدت أنه من "صَفِها" وركزلي على كلمة "صَفِها" لإن مصفى البلد صفوف الله وكيلك، طبعا من دون ما ننسى الطابور الخامس، يلي سبق وقلت إنو هيدا طابور منظم اكتر من أي طابور مدرسة أو إعاشة...حاصلنه بلا طول سيرة، حكى زياد معتقداته بعفوية، لهون ما بعتقد في غلط، إنو طالما زياد إنسان وعايش بدولة على الكرة الأرضية، فابعتقد حقو إنو يكون عندو رأي سياسي، ومعقول كتير يكون رأيو ما بيشبه رأيك ولا رأيِ ولا رأيْ جارنا، وفيه يكون رأي بيشبه حيالله رأي موجود على الساحة...الخبرية إنو الخلط ما بين زياد الموسيقي وزياد السياسي هو الخطأ الفادح يلي إرتكبوا الجمهور، والمذيع يعني غسان بن جدو، إنو ضروري يكون زياد سوبر مان؟

 هجوم زياد على 14 آذار كان واضح، وهيدا رأي سياسي، يمكن يكون صح يمكن يكون غلط، متلو متل أي رأي سياسي تاني...
يا خي ما قدر يعمل شي للقضية الفلسطينية، وين القصة؟ إنو واقفة القصة عليه هوي؟ إنو معقول مفتاح السول يفتح باب حرية فلسطين؟ وبموضوع حزب الله، قال الزلمة إنو ما انتقل من جهة لجهة، طالما بالفترة يلي بلش فيها سياسة ما كان في شي إسمو حزب الله...
يعني شو؟
 هيدا يعني إنو من الاساس في منطق معين بفكر في زياد على الصعيد المقاوم، وَجَدو مؤخرا بحزب الله...ما بعتقد في غلط بالمسألة أساساً...الأنكى وين؟ إنو بدل ما الحلقة تقدم شي يجمع، قدمت مبارزة فايسبوكية على تأييد زياد ما بين إيه ولأ..وإيه لأ مش منطق يلي صار..لأن شكلنا فهمانين الإعجاب غلط!!..يعني فيني حب موسيقة زياد، نص زياد المسرحي، وبذات الوقت فيني ما طيق رب سياستو...عادي بيسوى إشكور بموسيقة الزلمة...إنو هوي "
Public Figure" مش مرتك لتاخدوه "Package" وحدة...




 











عفوية زياد غيرت نظرة البعض لإلو...من هون منعرف إنو ما في أمل، لأن على زياد ما عارفين نجتمع..عمين ممكن نجتمع؟ نتجمع على الخير إنشالله....

والمصيبة الكبرى بالمقابلة، هوي إن بقرد ومقردة مصر غسان يعمل زياد الرحباني، steven seagal الثورة العربية، وزياد ما إلو جلد...:
- إنو كيف طلعت معك "عودك رنان"؟
- دغري
- طب شو رأيك بعد في امل؟ متأمل بالبلد؟
- هيدي ما خصا بالسياسة، هيدي وحدة بتحب واحد...وبالنسبة للبلد ما في امل هيدا موضوع تاني.


...يعني في كتير أسئلة مش بمطرحها...فيكن تحضرو المقابلة على الروابط يلي تحت.




مقابلة زياد الرحباني في الميادين - الجزء الاول




مقابلة زياد الرحباني في الميادين - الجزء الثاني