Sunday, July 10, 2011

شو مشكلتنا؟>>>شوية منطق>>>كلنا أمركان من أصل صهيوني>>>


إنشالله كون غلطان
شو مشكلتنا؟

مشكلتنا مش بقطع المي..أو بقطع الكهربا...مشكلتنا بأحزاب كامشة السياسة من  "دنبا" حتى ما نقول شي تاني...!
مشكلتنا مش دركي عم يقبض وهوي آعد بالبيت...مشكلتنا بأحزاب عم جيَشوا الشعب المعتر تحت عناوين دينية وعواطف ومشاعر كذابة، مشكلتنا بشعب مسروق تفكيرو...مشكلتنا بناس عم تموت مسممة لأن ما في رقابة على الأكل...الخبز وبقلبوا رصاص..شو بدنا أكتر من هيك؟

شوية منطق:

معقول في أشخاص بتلتقي بشخصية سياسية دينية المفروض ما ينعرف وينا.. وبتلتقي بالسفير الأميركي تاني نهار؟ إنو يعني بدك تقلي إنو الأمركان والصهاينة ما بيعرفوا بيت كل شخصية بلبنان؟ لكن
C.I.A شو عم تعمل؟؟ عم تقمع لوبيا؟...ما بعتقد!
إنو قدروا يقتلو شخصية لبنانية مهمة بسوريا..وتركوا التاني بلبنان...ولو؟
 لو يلي هون مهم..كانو صفوا من زمان...
ورجل الأعمال يلي مات من كم سنة..ما مات هيك..وما مات غير هيك..مات لإنو كان منافس إقتصادي فهمان اللعبة وقال لأ لغيرو...

كلنا أمركان من أصل صهيوني:

 14 محور الإستسلام وعملاء بنظر 8...و8 محور ممانعة وعملاء بنظر 14 ...ولبنان مكون من 14 و من 8 وشوية ما فرقا معون...فإذاً أغلبنا عملاء...إيران بتجيب سلاح من أميركا..أميركا ضد إيران...حزبالله تابع لإيران ..روسيا "تاجر المنطقة" سوريا متل "حرامي الكهرباء" إلو تلات روس واحد منون بيركب عليه فيش أمركاني.
14 بزوروا الأمركان..ساندين ضهرن بالمجتمع الدولي...8 آذار بتخون المجتمع الدولي و مناصرة لإيران ، إيران ما مخلية صفقة سلاح إلا وما ماضيتها مع الأمركان "رأس الحربة" المجتمع الدولي....حلها إذا فيك تحلها!!!

الحكومة الحالية: للتريث..يوضع في الدرج إلى أجل مسمى!.
                                                                 جاد شحرور -10-7-2011