Wednesday, February 2, 2011

إنشالله كون غلطان 7

إنشالله كون غلطان
مش مهم...
في واحد بالجنوب ...خاطفينو الإسرائلية..ولا إلك مش مهم...كراسي الحكومة اهم.
يوم إيه يوم لأ...بزيد سعر البنزين...
ولا إلك مش مهم...كراسي الحكومة اهم.
علاقات وطيدة بين حزب الله وقطر...وقطر فيها أكبر قاعدة أميركية بالمنطقة... ولا إلك مش مهم...كراسي الحكومة أهم.
ما بهم...مش مهم...في أهم...

وقمح رح ناكل بهالبلد...
شغل واقف...إقتصاد واقف...سياسة واقفة...معاملات رسمية واقفة...أنا واقف إنت واقف كلنا واقفين...لك بطل يوقف...قمحة فاسدة هالبلد.

تبادل ثقافات...
على مر الخمس سنين تعلموا 14 آذار فن تظاهر والتخريب وحرق الدواليب من 8 آذار...و8 آذار تعلموا من 14 آذار كيف يسقطوا ويطلعوا حكومة من خلال الدستور...تبادل ثقافات....

زهئان، وشغل ما في...
مصطلحات عم تثبت وجودها يوم بعد يوم...شغل ما في..لأن الوضع ما منيح...زهئان بتضهر بتروح بتجي بتنبسطلك نص ساعة...وبترجع لنقطة الصفر بتزهىء من جديد...بتضهر أول كم يوم بأول الشهر..ومن نصَوا وبطالع بدق ناقوس الخطر ليحذرك إنو في عجز بجيبتك والمصاري بلشوا ينقصوا منيح..فببلش العد العكسي..بدب فيك النخوة لتفتش على شغل من جديد علما إنك إنت قبل مفتش وبارم ليوم البرم...بس بتقول المحاولة مش غلط...وبترجع لذات النتيجة إنو ما في شغل..بهالفترة بكون مضى الشهر ومنرجع للبداية...أول الشهر وذات شي بتعيد الأحداث نفسها..بتضهر أول كم يوم..بدق ناقوس الخطر..بتبرم على شغل ما بتلاقي..وبيرجع بيجي أول الشهر..وهكذا دوليك..

أيام جديدة على الرزنامة:
الإثنين :  يوم السحب
الثلاثاء: يوم الغضب
الإربعاء: يوم يلي بزيد في غلى البنزين
الخميس: يوم السحب
الجمعة: يوم الخطابات الدينية يلي بتكفر الطوائف بعضها
السبت: منجتمع مع رفقاتنا بشي سهرة وبدل ما نرقص ونتسلى..منصير نستعرض الأمور السياسية فمنعلق ومنفكس السهرة
الأحد: يوم الخطابات الدينية يلي بتكفر الطوائف بعضها

جاد شحرور- شباط-2011-مجلة شؤون جنوبية