Monday, November 1, 2010

إنشالله كون غلطان4

إنشالله كون غلطان

عونك رنان.. رنة عونك إلي... عيدا كمان ضلك عيد يا نجاد سمعني العون عل عالي عيدا  كمان
سؤال بيطرح نفسو...شو يلي ممكن يغير نظرة الفرس للعرب ويصيروا يتقربوا منن!؟!؟!..مش مشكلة في مية جواب ..واحد منن الهدف الإقتصادي...بصراحة أنا مش ضد إنو يكون هيك هدف هو الأساس بالنسبة لإيران..أنا ضد، بل برفض إنو ما تكوون علاقتنا على هيد الأساس وما تكون واضحة مية بالمية...يعني بس لو ببين هيدا شي على العلن ومنكب كل هالخطابات الأدبية عجنب...ويا نجاد عونك رنان
.. رنة عونك إلي... عيدا كمان ضلك عيد يا نجاد... سمعني العون عل عالي عيدا  كمان

عن عمر وعلي وما بينهما....
علي...عمر...منلاحظ إنو حرف العين مشترك...فإذا على العين  “والراس...بضل ب"علي" .."لي" بعد ما حللنا العين طبعا...وبعمر بضل "مر"...لنحط قدامنا "لي" و "مر" ونجرب نجمعون..فمنتوصل لــ " ميلر"..يعني بتستبدل "الميم" ب "لام" وبتجعو الأربع احرف..فببتكون "ميلر" مين "ميلر"؟ ميلر يا سيدنا الكرام هوي كاتب مسرحي أمريكي من أصل يهودي "أرثر ميلر"...فبقول هل إنسان الموقر:
"
ان قمـع الفلسطينيين والمستوطنات في الضفة الغربية خيانة لمثل التوراة العادلة التي ألهمت تأسيس دولة إسرائيل". وقال "ان ما بقي من الحلم بمجتمع تقدمي مسالم في 1948 هو الضد تماماً: مجتمع مسلح يائس على خلاف مع جيرانه والعالم" وكان واضح جدا بدعوتو للقيام بدولة فلسطينية...شوفو هيدا الزلمي شو قال و شو بيقول أكبر ثورجي عنا بالعالم العربي...يا خي إنسى العرب شوي خلينا بلبنان...بعدنا ب"عمر وعلي" والعالم عم تحكي بالقضايا ال xl ونحنا بعدنا بال small
...بس يا ريت منتمثل مش ب "ميلر " منتمثل ب "عروبيتنا "...يهودي وعلَم علينا...! الله يخليلنا علي و عمر....!

 ميزة
الصين: أكبر دولة صناعية
فرنسا: أكبر
دولة مختصة بالموضة والعطورات
أميركا: أكبر دولة مستثمرة للموارد البشرية
لبنان: أكبر صحن تبولة.....لأ..ميزة...شو بدك بالحكي..!

التكرار بعلم...... وإنشالله كون غلطان.
هلىء الحرب راجعة متل ما راجع يتعمر لبنان!! ما هي هيك مرة منخرب ومرة منعمل ثورة، وهيك بضل الإعلام شغال، وهيك بضل السياسي إلو قيمتو بالبلد، وبضل الصحافي عندو شي يكتب عنو، وبضل الفنان يقدر يستعمل الوطنية ليستقطب جمهور، وبضل لي متل حكايتي يلعي ويلعي ويلعي ويعمل حالو فهمان...ما بعدا الحالة متل ما هي...بعدو الدكنجي عنا بالحي بينصب طلوع نزول بحجة الضرائب وغلى الأسعار، وبعدو صاحب البناية عنا بيعلق وراق إنو في عجز بصندوق البناية، عأساس كاين صندوق الدعم الأوروبي هوي، إنو والله إفريقيا معتمدة على دعم صندوقنا المبجل ليساعدوا أطفالون...
ما من ال1975 لاهلىء بعدا:
-الميراث الحزبي موجود.
-زعمات العائلية موجودة.
-الجدل حول الكيان السياسي والقومية العربية موجودة.
-الأحزاب اليسارية ورغبف الخبز..بس ما عرفنا إذا عربي ولا مرقوق..بدك ما يكون فرنساوي...
-الأحزاب الدينية وقمعها وترهيبها للشعوب المؤمنة من وراء أحاديث و كتب سماوية.
وبعدو الفرز الأيدولوجي يمين ويسار...وفهام بقى....


وضع...
سهرة مع السمرة والجو ليلكي...وتر بيحكي ونسيم بغني والقافلة تمشي.. لأ تسكر...هيدا نحنا بعض ال12:00 am بليل...منرجع منفتح عيونا الصبح لنفيق المي مقطوعة ما فيك تغسل..فمنكل علكة كرمال ما فينا نفرشي سنانا ومنلبس كنزة بعد ما جبناها حل لمشكلة الكهرباء المقطوعة يلي حرمتنا لبس القميص لأن بدو كوي...و15000 لإشتراك الستلايت يلي صار 20000 لأن زاد محطات وطلعوا بالأخر محطات رومانية ومحطات طبخ صينية..لك شو بدنا بسماهون هولي نحنا، بس فهمني..وبما إنو البنزين غالي..خلص منروح على الشغل taxi وخود على أحاديث بالtaxi ...:
taxi: يا زلمي ينعن إخت الدولة غلولنا البنزين وتسعيرة بعدا هي هي...لك ينعن إخت الدولة قاطعيلنا المي وصارلي يومين بلا
حمام..آخ آخ ينعن إخت الدولة ضرائب طلوع نزول لك أيا نزول، طلوع بس، ما في غير طلوع وصلوا لعند سابع سما وهني يطلعو..لك ينعن إخت الدولة منا عيشة..لك ليك الشوب ينعن إخت الدولة......
-أنا: شو خص الدولة بالشوب؟....




جاد شحرور-تشرين2-2010-مجلة شؤون جنوبية