Friday, October 1, 2010

3إنشالله كون غلطان

إنشالله كون غلطان
7 ايار و لا 7 مليون دولار؟
كنا بــ"سيد" صرنا بتنين، والسيد التاني جميل، جميل جداً، معتبر حالو مظلوم....بس ببطل مظلوم إذا ربح اليانصيب اللبناني بمبلغ يقدر بحوالي 7 مليون دولار...و كِتر منو منيح عم يعطي خيارات مهمة : 7 ايار أو 7 مليون دولار؟...على كلن على كل حال،ما فينا نقول إلا " كل الناس خير و بركة " كرمال "ألإلفة". بعيد من هون ..الله لا يقدر...إنو يكون في "إلفة".
أساسا إنو يكون في "إلفة" مش واردة.. بس منتمنى..تمني مش أكتر.... و
إنشالله كون غلطان.
أبراج
برج حمود: عزيزي حمود الأرمن باقون....
برج البراجنة: أعزائي البراجنة إنتبهوا من الرمل العالي....
برج أبي حيدر: مشاكل مع الحبيب، وشكلك مش حاسب خط الرجعة....


لبنان حالتو منو وفيه، طبيعتو منو وفيه
هوي لبنان حالتو منو وفيه، طبيعتو منو وفيه...كيف يعني؟! مثلا "فرنسا " من شو مكوَنة؟ مكوَنة من حضارة شعب، تقاليد، تاريخ...علامة فارقة: "برج إيفل"....لبنان من شو مكوَن؟ مكوَن من حضارة ما إلا رب، تقاليد مش مفهومة زيادة، تاريخ معجوق، علامة فارقة: "مشاكلو السياسية"...يعني فحوى الكلام إنو كل هالعناصر هي لبنان، يعني يلي بميَزو عن أي دولة تانية إنو مكون من مشاكل مش من شعب، بس إذا بدك فيها تكون المشاكل منطلقة من شعب، شعب تاريخوا كان مليان بالنقص..نقص الحاجيات من مجاميعو..."إجتماعيا، إقتصاديا، وسياسيا" فإذاً منقول إنو لبنان حالتو منو وفيه، طبيعتو منو وفيه...

فلكلور معروف
الطربوش بيحكم والصباط بيمشي...
الطربوش بيأمر والصباط بنفذ....
الطربوش بيقرر والصباط بيوافق...



يلزمنا آنسة للعمل-الخبرة ضرورية-
بعد البحث والتدقيق قررنا نغير المعادلة السياسية ونستبدل السياسيين بفنانين ومش حيالله فنانيين، فنانيين يعتبروا أيقونة مميزة بعالمنا العربي طبعا مع مراعاة التوزع الطائفي..حتى ما يتهمونا إنو عم نغير بالعرف...والمرشحين هني:
زياد الرحباني رئيس الجمهورية
هيفا وهبي رئيس مجلس النواب..إيه إيه هيفا حتى ينحل ضهر الإيراني ويفل عنا...
رئيس حكومة.... لحظة لعمى وين بنات " السنة " ؟؟ ما في شي مغنية، رقاصة، رسامة يا خي...؟
إعلان رسمي مطلوب فنانة كيف ما كانت تكون.. لتوًلي منصب رئيس الحكومة....مضطرين تكون آنسة وتكون "خبرة " قصدي عندها خبرة...
يعني كيف ما كان ما حدا بيختلف على الجنس اللطيف...وهيك العلاقات العامة بتكون سهلة مع الجنس اللطيف...
على الـCosta
متل كل واحد شبيح، قابض حالو إنومثقف مهم،كنت قاعد بشارع الحمراء بقهوة الـ Costa  هونيك شفت كزا شغلة مش غريبة بس كترانة وصايرا أنواع، مثلا شحاديين مع آرمات، يعني عم يتطوروا الجماعة صايريين يفوتو باللغة ليشحدوا..
شفت الأجانب بس متنوعين أكتر..يا زلمي شفت رجلين ختيرية من تايلند، لأ وقفوا يقرو حكي قدامي وأنا إتفلفل لأعرف عن شو عم يحكوا..إضرب أخماس بأسداس...إنو مثلا معقولي يكونو عم يحكوا سياسة، إنو بركي عندن شي حزب مسلح عم يهدد الدولة وهني مستائين  أو مثلا شي رئيس حكومة ما عارف يدير البلد...لأن كانو معصبين هني وعم يحكوا...يعني بتطرقك حشرية لتعرف شو عم يحكو..شفت لو بنتين تايلندية بقول الواحد إنو سقف حلقن يحكوا بالمساج....كونون مشهورين بالـ
beauty centers
. على كلن على كل حال، بحبك يا حمراء....



جاد شحرور-تشرين 1-2010-مجلة شؤون جنوبية